ينفورماتسيا اشكەرەلەۋ: mzjubao@cnr.cn

سۋرەتتەر سويلەيدى

قاردا قالعان قىزىلقات

来源:جۇڭگو قازاق راديو تورابى     |责编:阿依娜古丽|     发布日期: 2019-11-28 10:32

 

   ماقالاسىن جازىپ سۋرەتتەرىن تۇسىرگەن باقىتبەك ءجۇمادىل ۇلى 

    كۇز ارتىنان قۋالاي قىس كەلدى دە، كۇن سۋىتىپ ارت-ارتىنان جاۋعان اقشا قار توڭىرەكتى اق كورپەمەن قىمتاي باستادى، وزەن بويىنداعى سارالا جاپىراقتارى تۇگەل ءتۇسىپ ۇلگىرمەگەن تال-تەرەكتەردىڭ جاس بۇتاقتارى اق ۇلپا قارمەن ورانىپ، شاشاقتى جاۋلىق سالعان جاس كەلىنشەكتەردەي مايسىپ، باستارىن ءيىپ تۇر. قاقاعان قارا سۋىق بولا قويماعان قىس باسىنداعى وزەن بويىنىڭ العاشقى قار قىمتاعان وسى كورىنىسى، قيقىمەتتى قىس بوياۋىن جاريا ەتىپ، ەركىڭدى الا وزىنە باۋراپ، كوركىنە كوڭىل بۇرعىزادى.


    قىس باسىنداعى العاشقى قار جاۋعان وسىنداي كەزدە، جۇقالتاڭ قاردى كەشىپ، توعاي ارالاۋ بالا كەزىمىزدە جانىمىز جاقتىراتىن، ءلاززاتى بولەك ءبىر قىزىق ەدى. ال قازىر جاستىق شاقتاعىداي توعايدا قارداعى قىرعاۋىلدىڭ ءىزىن قۋىپ، ءىيىرىم جاعاسىنا ۇيرەككە تۇزاق قۇراتىن البىرتتىق الىستا قالىپ، فوتو اپپارات كوتەرىپ، اياقتى اڭداي باسىپ، قار قىمتاعان الاپتان كوز تارتقان كورىنىستەردى سۋرەتكە الۋدى قارايلاستىراتىن اۋەسىمىزدىڭ بەت بۇرىسمەن تاعى توعاي ارالاپ كەلەمىن.


    جاعادان الىستاۋ توعايدىڭ شەتىنە الا الاڭقىعا شىققان ءتۇپ-ءتۇپ ۇشقات اعاشىنىڭ شىلدەدەگى شيەدەي قىزىل جەمىسى اقشا قارمەن ارالاسىپ، الىستان كوزگە تۇسە كەتتى. تاياپ بارىپ بايقاسام قاردان كەيىنگى اشىق كۇندە ابدەن پىسقان، توڭازىپ ءتۇسىپ قالۋعا ءالى ۇلگىرمەگەن وسى ۇشقاتتىڭ قىزىل جەمىسى كۇن نۇرىنا شاعىلىسىپ، دالادا جۇرىپ، سۋىق قارىپ البىراعان ويىن بالاسىنىڭ الما جۇزىندەي كورىندى.


    «جوق ىزدەپ جۇرىپ، تويعا كەز بولىپتى» دەگەندەي العاش جاۋعان اقشا قار جاپقان توعايدان، قانداي كوركەمدىك بايقالار دەپ كەلە جاتقاندا جولىققان ۇشقاتتىڭ قىزىل جەمىسى، العاشقى قاردىڭ كوركىن ءتىپتى ايشىقتاي تۇسكەندەي بولدى. «مىڭ ەستىگەننەن ءبىر كورگەن ارتىق» دەگەندەي، كورگەنىمىزدى سوزبەن كوپ اسەرلەمەي-اق، وسى كورنىستەردەن وقىرماندادا بىرگە كوز ايىم بولسىن دەپ، «قاردا قالعان قىزىل قات» دەگەن مىنا جەلىلەس سۋرەتتەردى بەرۋدى ءجون كوردىم !.


    راس-اۋ، ۇشقات دەگەن اعاشتى كەيبىر وقىرماندارىمىز تولىق بىلمەسە كەرەك دەپ وسىمدىك عىلىمى كاتوگارياسىنداعى مىنا ساۋاتتى جالعاپ قويدىم. ۇشقاتتى تانىپ، بىلەتىندەر ءۇشىن ارتىق بولماس.


    ۇشقات: ۇشقاتتار تۇقىمداسى گرۋپپاسىنا جاتاتىن، جازىق توعايلى وڭىرلەردە ارالاس وسەتىن، ىستىق، سۋىققا، شولگە ءتوزىمدى كوپ جىلدىق ۇساق اعاش. ۇشقات ءشىلبى، قىزىلقات دەپتە اتالادى. ۇشقاتتىڭ جالپىلىق عىلمي اتاۋى (忍冬)، [Lonicera L. ]. ۇشقاتتىڭ تۇكتى ۇشقات، قىلقاندى ۇشقات، تىكەندى ۇشقات، قىزىل ۇشقات، كانادا ۇشقاتى، ءيىستى ۇشقات، ٴتاڭىر تاۋ ۇشقاتى سياقتى 20 نەشە ءتۇرى بار.


    ىلە وبلىستىق مادەنيەت-ساياحات مەكەمەسى

 

中央广播电视总台 央广网 版权所有

قاردا قالعان قىزىلقات

قاردا قالعان قىزىلقات