ينفورماتسيا اشكەرەلەۋ: mzjubao@cnr.cn

ادەبيەت ارناسى

عاجايىپ تەلەفون ءنومىرى

来源:جۇڭگو قازاق راديو تورابى     |责编:阿依娜古丽|     发布日期: 2020-06-09 09:41

 

فرانك نەۋكرۋگەر (ا ق ش)


    حانزۋشادان اۋدارعان: ريشات سابىرباي ۇلى


    ساباۋ قامشىلى، جالقى وتباسىمىز. ىرگەلەس دوللي حانىمنىڭ ايتۋىنشا، انام مەن تۋىلا سالىپ، كەلمەس ساپارعا اتتانىپتى دا، اكەم ول جونىندە ءتىس جارىپ كورمەپتى. ەسىمدە قالۋىنشا، اكەم ەرەكشە قاتال بولىپتى. اشىلىپ سويلەمەيتىن، تۇرمىسىم مەن ۇيرەنۋىمە قاتاڭ تالاپ قوياتىن.


    ونىڭ سەرىكتىگى بار. بىلايشا ايتقاندا، وسى قالاشىقتاعى باردام وتباسى سانالاتىنبىز. دەسەدە، قالتامداعى ۇساق اقشالارىم وزگە بالالاردىكىندەي كوپ بولمايتىن. بۇل عاناما ەمەس، ءاركۇنى سەرىكتىككە بارار جولدا ءار كەز ءبىزدىڭ مەكتەپتىڭ جانىنان وتەدى. ءبىراق، قانشا جالىنسام دا مەنى كولىگىنە وتىرعىزبايتىن-دى. سوندىقتان، مەكتەپكە كوشە اۆتوبۋسىمەن، بولماسا، جەر استى مەتروسىمەن باراتىنمىن. وسىلاي بولعاندىقتاندا، اكەمنەن ابدەن كوڭىلىم قالعانى سونشا شايناپ-شايناپ تاستاعىم كەلەتىن. انامنىڭ قازاسىن دا ۇنەمى جابىرلەۋىنەن بولعان دەپ اكەمنەن كورەتىنمىن. ونىڭ كۇنى بۇگىنگە دەيىن سالت باستى ءجۇرۋىن، وسى ءبىر قيتۇرقى مىنەزىنە بولا ەشكىمنىڭ جولاماۋىنان بولار دەپ تۇيەتىنمىن.


    ون سەگىز جاسقا شىققان جىلى امەريكادان جاڭا زەللاندياعا وقۋعا باراتىن بولدىم. بۇل مەنىڭ العاش رەت اكەمنەن الىستاپ، ۇيدەن ۇزاپ شىعۋىم بولماق. دەگەنمەن، اكەمە دەگەن ەشقانداي قيماستىق سەزىمىم جوق ەدى. اۋەلى، وسى ءبىر سۇرەڭسىز ورتادان، قيتۇرقى اكەمنەن ەرتەرەك قۇتىلۋعا اسىقتىم.


    جۇرەر الدىندا، جاڭا زەللانديادان وقيتىن ساباقتاستاردىڭ تەلەفون نومىرلەرىن ىرىكتەپ، قولفونىما ساقتاي باستادىم. الايدا، بۇنىڭ دا سەنىمدى بولا قويمايتىنىن، قولفوننان دا ءوشىپ كەتۋى مۇمكىن ەكەندىگىن ويلادىم. سونىمەن، بارلىعىن قايتادان ەستەلىك داپتەرىمە جازىپ شىقتىم. ەندىگى جەردە ەستەلىك داپتەر جوعالىپ كەتسە قايتەم دەپ ودان دا الاڭداي باستادىم. ونداي جاعداي تۋىلسا، جالعىز ءوزىم جات جەردە قالاي جۇرە الامىن!؟


    اقىرى، امالىن تاپتىم، بارلىق ءنومىردى جاڭا العان باتەنكەمنىڭ ىشىنە دە، باس كيمىمنىڭ ىشىنە دە، شاپانىمنىڭ ىشىنە دە جازىپ الماق بولدىم. وسىلاي بولعاندا، بىرەۋىنەن ايىرىلعانىممەن تاعى بىرەۋى قالادى عوي.


    اۋەجايدامىز. اكەم سالتىنان جازعانداي مەنى شىعارىپ سالۋعا كەلدى. ەسىمدە قالۋىنشا، اكەم مەنى ەجەلدەن ءبىر جاققا ەرتىپ اپارعان ەمەس. قىل اياعى، مەكتەپكە تىزىمدەلۋگە بارعانىمدادا جالعىز بارعان ەدىم. سول سەبەپتى، اكەم ەكەۋىمىزدىڭ بۇل رەتكى ءۇنسىز عانا كەلە جاتۋىمىز ماعان ۇيرەنشىكتى ءىس سياقتى سەزىلدى. ماڭايىمىزداعى بالالارىمەن قوشتاسىپ جاتقان اتا-انالاردا جىلاپ-سىقتاۋى كوڭىلىمە قاياۋ سالا قويمادى.


    كشكەنتايىمنان جالعىزدىققا ۇيرەنگەندىگىمنەن بە، سىرتتا تەك وزىمە عانا سۇيەنەرىمدى جاقسى بىلەتىنمىن. دەگەنمەن، باسقاعا باس قاتىرماسام دا، ساباقتاستاردىڭ بايلانىس نومىرىنەن، استە، ايىرىلىپ قالۋىما بولمايدى.


    جاڭا زەللاندياعا جەتىسىممەن-اق «تەلەفون داپتەرلەرىمدى» اقتارىستىرا باستادىم. ارينە، ەڭ الدىمەن قولفونىمدى قارادىم. دەسەدە، كوزىمە بەيتانىس ءبىر ءنومىر جارق ەتە قالدى. انىقتاپ قاراسام، نومىرمەن قوسا اكەمنىڭ اتى تۇر. اكەمە ەشقاشان تەلەفون سوقپاعانىم ەسىمدە، اۋەلدەسەڭ، ونىڭ ءنومىرىن دە بىلمەيمىن. ونىڭ مەنىڭ قولفونىمدى قوزعاعانى مۇندا تۇر. ەندى مەن ەستەلىك داپتەرىمدى قاراي باستادىم. ءيا، داپتەردىڭ ءبىرىنشى بەتىندە دە اكەمنىڭ ءنومىرى تۇر. ءدال اكەمنىڭ قول تاڭباسى. جالما-جان، باتينكەمدى، باس كيىمىمدى، شاپانىمدى قاراپ شىقتىم.


    و، قۇدىرەت، مەن جازعان تەلەفون نومىرلەردىڭ ەڭ باسىندا تاعى دا اكەمنىڭ ءنومىرى جازىلىپ قالعان.


    بىلاي قاراعاندا، ەشتەڭەگە باس قاتىرمايتىن، قىتىمىر اكەمنىڭ دە مۇنداي اقجارقىن نيەتى بارىن سەزىنبەپپىن. سىرتتا ءجۇرىپ، قيىندىققا ۇشىراساڭ ەڭ الدىمەن ەسىڭدە مەن بولايىن دەگەنى سياقتى.


    مەكتەپكە ورنالاسىپ بولعان سوڭ، ادەتىمشە، ينتەرنەتكە شىعىپ، ساباقتاستارىمنان كەلگەن حاتتى تاپسىرىپ الۋعا وتىردىم. بۇل جول دا، ەڭ الدىمەن كەلىپ تۇسكەنى اكەمنەن كەلگەن حات بولدى. «فرانك، بالام، ەندى ەرجەتتىڭ قارعام، وسىءبىر كۇندى توسقانىما ون سەگىز جىل بولىپتى. اناڭ تۋىت سەبەبىنەن قينالىپ كوز جۇمدى. مەن وعان سەنى باعىپ-قاعىپ، امان-ەسەن ەرجەتكىزەم دەپ ۋادە بەرىپ ەدىم، مىنە بۇگىن ەرجەتىپ، ءوز كۇنىڭدى ءوزىڭ كورە الاتىن بولعانىڭا قاباعات قۋانىشتىمىن. بەيىش تورىندە شەشەڭدە قۋانىپ جاتقان بولار. دەسەدە، تەلەفونىڭا مەنىڭ ءنومىرىڭدى ساقتاماعانىڭدى كورىپ، قايتەرىمدى بىلمەي قالدىم. سىرتتا ءجۇرىپ قيىندىققا تاپ بولعان ءارقانداي بالا ەڭ الدىمەن اكەسىن ىزدەۋى ءتيىس قوي.


    بالام، اكەڭنىڭ تاربيەلەۋ داعدىسىندا ماسەلەلەر بولعان بولۋى مۇمكىن، وزىڭە تىم قاتاڭ مامىلەدە بولعان شىعارمىن. دەسەدە، وزىڭە ايتارىم، مەيلى قالاي بولسادا، اكەنىڭ جانى بالانىڭ ۇستىندە بولماق... بۇگىن، ون سەگىز جىلدان بەرگى كوكىرەگىمە بايلانعان شەردى كوز جاسىممەن سارقىپ وتىرمىن، قارعام.

中央广播电视总台 央广网 版权所有

عاجايىپ تەلەفون ءنومىرى

ساباۋ قامشىلى، جالقى وتباسىمىز. ىرگەلەس دوللي حانىمنىڭ ايتۋىنشا، انام مەن تۋىلا سالىپ، كەلمەس ساپارعا اتتانىپتى دا، اكەم ول جونىندە ءتىس جارىپ كورمەپتى. ەسىمدە قالۋىنشا، اكەم ەرەكشە قاتال بولىپتى. اشىلىپ سويلەمەيتىن، تۇرمىسىم مەن ۇيرەنۋىمە قاتاڭ تالاپ قوياتىن.