شىنى جۋعان قىز شەشەسىنىڭ قادىرىن بىلەدى
كەلۋقاينارى: |جاۋاپتى رەداكتور: | جاڭالانعان ۋاقىت:2019-08-13 10:07:00


ماقسات قيزات ۇلى

 

 

 

 

بالام جاقسى بولسىن،-دەسەڭ، قولىنا كۇرەك بەر. بۇل وتكەن جىلى تانىمالى حارۆورد ۋنيۆەرسيتەتىندە جارىق كورگەن تارتىمدى ماقالانىڭ تاقىرىبى.

 

جازبانىڭ ايتپاعى ايدان انىق: بالاڭنىڭ ويى دا، بويى دا شىمىر بولسىن،-دەسەڭ، دەنە ەڭبەگىمەن دوس قىل.

 

ەندى بۇل جايىندا ءبىزدىڭ اتا-انالارعا ايتىپ كورىڭىز، ەكى قولىن توبەسىنە قويسىن دا: ءۇيباي-اۋ، ايتادى ەكەن عوي، ءبىز قالادامىز، كۇرەكتى قايدان تابامىز، ەڭبەكتى قايدان ىزدەرسىڭ،-دەپ شالقادان ءتۇسسىن.

 

ءبىراق بۇنىڭ ءبارى ءوزىمىز ويلاپ تاپقان جىلاڭقى جوسىن ءھام بالامىزدىڭ باسىنان قۇس ۇشىرعىمىز كەلمەيتىن جالعان جاناشىرلىق.

 

ايتپەسە ءۇي ءىشى – ەڭبەك مايدانى، شىن ىزدەگەن كىسىگە قالاداعى قابات ءۇيدىڭ اس ۇيىنەن-اق ءبىر تالاي ەڭبەكتىڭ ءىزىن تاۋىپ الماي ما؟

 

قىزىڭىز ون بەسكە كەلسە شىنى جۋعىزىڭىز، شىنى جۋعان قىز شەشەسىنىڭ قادىرىن سەزەدى.

 

ۇلىڭىز ون ۇشكە كەلسە، ءۇي سىپىرتىڭىز، بەلى بۇگىلسىن، بەلى بۇگىلگەن جىگىت ەڭبەكتىڭ ەڭكەيىپ ىستەيتىن اشتى دۇنيە ەكەنىن سەزەدى.

 

قازىر اياعىنداعى بايپاعىن، باسىنداعى بوركىن ءوزى جۋا المايتىن ‹اياۋلى› ءالجۋاز بالالارىمىز كوبەيىپ كەتتى.

 

ءبىزدىڭ ايتارىمىز بالاڭىز باليعاتقا تولسا، ءۇيدىڭ ءىرىلى-ۇساقتى جۇمىسىنا جۇمساي ءبىلىڭىز، بازار جاققا ءوزىڭىز شاپقىلاي بەرمەي، بالاڭىزدى جىبەرىڭىز، كورسىن. ەكى كۇندە ءبىر دوربالاپ اكەلەتىن زاتتىڭ قىپ-قىزىل اقشامەن كەلەتىنىن ۇقسىن.

 

كەيدە از اقشا بەرىپ، كوپ دۇنيە الدىرىڭىز، قولىنداعى تيىنى الاتىن دۇنيەسىنە جەتپەي دىعدىرى قۇرىسىن. ‹شەشە-اۋ، بەرگەن اقشاڭ از ەكەن، نەسىنە كوپ دۇنيە تاپسىرىپ ادامدى ۇياتتى قىلاسىڭ›،-دەپ قومپىلداپ كەلسىن، ءاربىر نارسەنىڭ قۇنى قانشالىق ەكەنىن ءبىلىپ، دۇنيەنىڭ تۇتقاسى ەسەپ-قيساپتا جاتقانىن سەزسىن!

 

ايتپەسە بارلىعىنا ءوزىڭ جۇگىرە بەرسەڭ، بالاڭ ەسەيگەندە ەڭبەكتىڭ دە، سەنىڭ دە قادىرىڭدى سەزبەيتىن بەزبۇيىرەككە اينالىپ شىعاتىنىنا كۇمانىڭىز بولماسىن. سودان كارتەيىپ اتا ساقالىڭ اۋىزىڭا تۇسكەندە، سوقتالداي قىزىڭا، شوقپارداي ۇلىڭا ءتىلىڭ وتپەي باسىڭدى توقپاقتاپ وتىراتىن بولاسىڭ.

 

بۇل كۇندە الدىنا قويىلعان جىلى، جۇمساق تاماقتى ىشە المايتىن كوكە جاسىق بالالار كوبەيدى. ‹ىشە قويشى اينالايىن، وسىنى ءىشىپ الساڭ انانى ىستەپ بەرەمىن، مىنانى ىستەپ بەرەمىن›،-دەپ جالىنىپ وتىرعان اتا-انانى كورەسىڭ.

 

وتكەن ۋاقىتتا اكەسىنىڭ ءبىر ۇزىم نانعا، شەشەسىنىڭ ءبىر ۇرتتام سۋعا زار بولعانىن بۇگىنگىنىڭ باي-پاتشاشى ۇعار ەمەس، قايدان ۇقسىن، ۇقتىرۋعا ءوزىمىز قۇلشىنباساق، جەتەكتەپ ءجۇرىپ ەڭبەك ىستەتپەسەك...

 

مىنا تىرلىكتە كىم بالاسىنىڭ جاقسى بولۋىن كوكسەمەيدى دەيسىڭ، اينالاڭا باجايلاپ قاراساڭ، كوز كورىپ جۇرگەن اتا-انانىڭ دەنى بالا دەگەندە قۇراق ۇشىپ، ۇرپاق جانىن شۇپىرەككە ءتۇيىپ، ارقا ەتى ارشا، بورباي ەتى بورشا بولىپ بولدىرىپ ءجۇر.

 

ءبىراق سونشاما بەرگەن بوداۋدىڭ تۇككە دە سەبى بولماي، ماپەلەگەن جۇيىرىكتىڭ شاڭ قاۋىپ، توككەن تەردىڭ دالاعا كەتكەن ءتۇسىن كورگەندە ءسىرا ءبىز نەدەن جاڭىلدىق،-دەگەن ويعا كوگەندەلەسىڭ.

 

قىرسىعى باسىنان اسىپ جاتقان بۇل ماسەلەنىڭ ادەتتەگى جوعارى مەكتەپ تۇگىل اتاعى جەر جاراتىن ۋنيۆەرسيتەتتەگى ستۋدەنتتەردىڭ بويىنان تابىلىپ جاتقانىن كورگەنىڭدە: ە، وقىعانىڭ ءبىر باسقا توقىعانىڭ ءبىر باسقا ەكەن عوي،- دەيتىن تۇجىرىمعا ات باسىن تىرەيسىڭ.

 

شاماسى وسىدان بىرەر جىلدىڭ الدىندا عوي دەيمىن، ‹حالىق گازەتى› ءۇنحات تەكشەسىندە : ۇيىقتاپ جۇرگەن ستۋدەنتتەر كاسىپسىزدىك الدىڭنان توسىپ تۇر،-دەگەن تاقىرىپتا ماقالا جاريالاندى.

 

ماقالا جوعارى مەكتەپ اۋلاسىن ءوزىنىڭ ماڭگىلىك جىلى ۇياسىن سەزىنەتىن ۇپىلمالىك ۇل-قىزداردىڭ اتا-اناسىنىڭ ارقاسىندا ىرعىن تۇرمىسقا كەنەلىپ، وقۋدى تۇبەگەيلى تارىك ەتىپ تايىراڭداپ جۇرگەنىن اشىنا تىلگە تيەك ەتىپتى.

 

بۇل ءبىزدىڭ بالالاردىڭ دا باسىنداعى باقىتسىزدىق، مەن كورىپ جۇرگەن ستۋدەنتتەردىڭ كوبىسى اق الاقان، تەلەفونعا تەلمىرگىش، اقشا جۇمساعىش، تۋىلعان كۇن تويلاعىش، ءسىرا سىمىرگىش...

 

ءبىر-ەكەۋىن ەبىن تاۋىپ قالانىڭ جەڭىلدەۋ قارا جۇمىسىنا سالىپ كوردىم، جيىرما بەسكە كەلگەن جىگىت جيىرما بەس كيلو ۇندى كوتەرە المادى، مىقشىڭداپ، مايماڭداپ بۇرالىپ قالدى. بۇگىن ءوزى جەيتىن نانىن ءوزى كوتەرە الماعان ۇلدىڭ ەرتەڭ ەل جۇگىن ارقالايتىن نار بولادى دەگەنگە كىمنىڭ سەنىمى بار؟

 

نان مەن ناردىڭ اراسىنىڭ بۇنداي ۇزاق بولاتىنىن ءبىزدىڭ ۇل مەن قىزدىڭ كوبىسى ۇعا العان جوق، ۇقتىرا الماعان ءوزىمىز - ۇلكەندەر. شىندىعىندا كەيبىر وقۋشىلار ۋنيۆەرسيتەتكە بارعان سوڭ ءوزىن تۇبەگەيلى ەركىن سەزىنىپ، مەكتەپ اۋلاسىن سايىران سالۋدىڭ تاپتىرماس تۇعىرى سەزىنەدى.

 

ءوزىمىز دە ۋنيۆەرسيتەت قۇشاعىندا بەس جىل وقىدىق قوي، سول كەزدە ءوز كيىمىن ءوزى جۋا الماي جىلارمان كۇي كەشكەن ەركە ساباقتاستاردى كورىپ تاڭ قالعانبىز، سويتسەك سونىڭ كوبى ىشكەنى الدىندا، ىشپەگەنى ارتىندا شىلقىپ عۇمىر كەشىپ جۇرگەن قالالىق بالالار ەكەن.

 

ودان بەرى ون التى جىل اۋنادى، دۇنيە تۇگىل تەلەفوننىڭ ءوزى ادام تانىماستاي وزگەرىپ كەتتى. دۇنيەنىڭ ءبارى دايىن، قولفونعا قول سوزسا بولعانى، اتا-اناسى ۇستىندە دايىنداپ بەرەدى. ءبىراق....

 

ءبىراق ولار دۇنيەدەگى ەڭ اقىماق ادام: ۇيىرەنەتىن كەزىندە ۇيىقتاپ جاتاتىن ادام،-ەكەنىن سەزبەيدى. سوندا تۇمسىقتىعا شوقتىرماي، قاناتتىعا قاقتىرماي وسىرگەن ۇل-قىزىمىزدىڭ وسىنشاما تەز وزگەرىپ، وسىنشاما تەز جەڭىلىسكە ۇشىراۋىنا كىم كىنالى؟

 

باستىسى وعان بارلىعىن دايىنداپ بەرەتىن اتا-انا كىنالى، تاپشىلىق كورمەگەن بالا ءتاتتىنىڭ قادىرىن سەزبەيدى. بالا ءوسۋ، جەتىلۋ بارىسىندا كەيبىر جاۋىن-شاشىندى ءوزى باستان كەشىرۋى كەرەك، ونداي كەزدە كەزدە باسىنا جاڭبىرلىق توسەپ، يىعىنا شاپانىڭدى جابا قويساڭ، قۇرىعانىڭ سول، قۇرىتقانىڭ سول.

 

قالاي بولعان كۇندە دە، بالا باليعاتقا تولعان سوڭ قارا جۇمىستىڭ قالپاعىن كيىپ، قازان-وشاقتىڭ قادىرىن سەزىنۋى كەرەك. كەرەك كەزىندە بالاعا قاتال بولعاننىڭ دا زيانى جوق، ۇيدەگى بالاڭا بارلىعىن دايىنداپ بەرسەڭ، جىلاسا جاستىق بولساڭ، تارپىسا توسەك بولساڭ، وندا كۇنى ول بالا سەنى جەر جاستاندىرادى.

 

بالاڭا استە وقۋدى جاقسى وقىساڭ بولعانى، قالعانىن ءوزىم ىڭعايلايمىن-دەپ تاربيە بەرمە، مىنا باسىمداعى ءۇيىم، بانكەدەگى ءجيعان-تەرگەنىم سەنىكى،-دەپ سەنىم باعىشتاما، اكەنىڭ ءجيعانى بالاعا داۋلەت بولمايدى.

 

بالا كوڭىلىن بۇلدىر دۇنيەمەن كۇپتى قىلما، بالاڭا ۇيات پەن نامىستى، ەڭبەك پەن ۇنەمشىلدىكتى، مەيىرىم مەن ماحابباتتى ميراس قىل، قالعانىن كوكىرەگىندە ساۋلەسى بولسا، ءوزى-اق تاۋىپ الادى.