شياڭگاڭ ەرەكشە اكىمشىلىك رايون ۇكىمەتىنىڭ ٴمانساپتىلارى قالا تۇرعىندارىن زورلىقتى كۇشكە قارسى تۇرۋعا ۇندەدى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-08-13 08:54:00


    شينحۋا اگەنتتىگىنىڭ حابارى: جۋىردا شياڭگاڭدا تۋىلعان جەلىلەس زورلىقتى ارەكەتتەر قوعامنىڭ زاڭمەن باسقارىلۋىنا اۋىر دارەجەدە ىقپال جاساپ، الەۋمەتتىك ٴتارتىپتى ٴبۇلدىرىپ، تۇرعىنداردىڭ تۇرمىسىنا كەدەرگىلىك جاساپ، ساۋدا قيمىلىنا كەرى ىقپال جاسادى، ٴتىپتى فينانس بازارىنىڭ ورنىقتى، ەكونوميكانىڭ باياندى دامۋىنا دا كەدەرگى بولدى. شياڭگاڭ ەرەكشە اكىمشىلىك رايون ۇكىمەتىنىڭ جوعارى دارەجەلى ٴمانساپتىلارى قالا تۇرعىندارىن زورلىقتى كۇشكە باتىل قارسى تۇرىپ، زاڭمەن جونگە سالۋدى قورعاۋعا، ساقشى اترەتىنىڭ زاڭدى قاتاڭ اتقارۋىن قولداۋعا، ٴبىر نيەتپەن ىنتىماقتاسىپ، قوعامنىڭ تەز ارادا تىنىشتىعىن قالپىنا كەلتىرۋگە، زەيىن-زەردەنى شوعىرلاندىرىپ، ەكونوميكانى قايتا سەرپىلتۋگە، قيىن-قىستاۋ ساتتەردى بىرگە وتكىزۋگە ۇندەدى.


    ەرەكشە اكىمشىلىك رايون ۇكىمەتى اكىمشىلىك ىستەر مەڭگەرمەسىنىڭ باستىعى جاڭ جيانزۇڭ 8-ايدىڭ 11-كۇنى توراپتا بىلاي دەدى: سىرتقى ورتا داعدارىسقا تاپ بولعان جاعدايدا، ەگەر قوعامدىق الاساپىراندىق تىنىشتالا الماسا، كاسىپ جانە قىزمەتكەر قىسقارتۋ داعدارىسىنان ساقتانۋ قيىن. ىشكى سىرتقى فاكتورلاردىڭ ىقپالىنان، شياڭگاڭنىڭ وسى رەتكى ەكونوميكاسىنىڭ پەريودتى كەرى شەگىنۋى قىسقا ۋاقىت ىشىندە اياقتامايدى. ەرەكشە رايون ۇكىمەتىنىڭ ۇيىمدارى شىنايى ىنتىماقتاسىپ، جوعارى مەن تومەن ٴبىر نيەت، ٴبىر تىلەكتە بولىپ، شياڭگاڭنىڭ تىنىشتىعىن ەرتەرەك قالپىنا كەلتىرۋگە كەپىلدىك ەتىپ، شياڭگاڭ تۇرعىندارىن قول ۇستاسىپ، زورلىقتى كۇشكە قارسى تۇرۋعا ۇندەۋدە.


    شياڭگاڭ ەرەكشە اكىمشىلىك رايونى ۇكىمەتى قازىنا مەڭگەرمەسىنىڭ باستىعى چىن ماۋبو بىلاي دەپ اتاپ كورسەتتى: تاياۋ مەزگىلدەگى ىركەس-تىركەس زورلىقتى كۇش سوققىسى بولشەك ساتۋ، اس-سۋ جانە قاتىناس-تاسىمال سياقتى كاسىپتەردىڭ كىرىسىن كورنەكتى تومەندەتتى، قوعامنىڭ تومەن اتموسفەرالىق قىسىمى تۇتاس تۇتىنۋعا قاتىستى سالالارعا تۇرلىشە دارەجەدە سوققى بولدى. شياڭگاڭ ىشكى قايشىلىق پەن قيىنشىلىق جاعدايىن حاۋىپسىز، ورنىقتى ورتادا شەشىپ، سىرتقى ورتانىڭ سايىسىنا توتەپ بەرىپ، قالا تۇرعىندارىنىڭ ازىق-تۇلىگى مەن تۇرمىسىن قامتاماسىز ەتەدى. ەرەكشە اكىمشىلىك رايون ۇكىمەتى شىعار جول تابۋعا كۇش سالىپ، كوپشىلىكتى بارلىق قالا تۇرعىندارى مەن بۇكىل شياڭگاڭنىڭ مۇددەسىن ويلاپ، زورلىقتى كۇشكە قارسى تۇرىپ، قيىنشىلىق قىسپاعىنان بىرگە قۇتىلۋعا ۇندەدى.


    قازىرگى اۋىر جاعدايدى كوزدە ۇستاي وتىرىپ، شياڭگاڭ وسى ايدىڭ 13-كۇنى اكىمشىلىك كەڭەسىن قالپىنا كەلتىرەدى، سونداي-اق «كاسىپورىنداردى قولداۋ، جۇمىستانۋعا كەپىلدىك ەتۋ» باعىتى بويىنشا حالىق قيىنشىلىعىن شەشۋ جانە كاسىپورىندارعا كومەكتەسۋ شارالارىن بەلگىلەيدى، الداعى جەردە جاريالاناتىن بيلىك جۇرگىزۋ مالىمەتىندە ەكونوميكالىق، حالىق تۇرمىسى تاقىرىپتارىنىڭ قاتىستى مازمۇندارىنا نازار اۋدارىلادى.

اۋدارعان: شالقار قازەز ۇلى