بان فۋتسىننىڭ اڭگىمەسى
0
2016-02-26 10:21:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :داۋىلبەك


    بان فۋتسىن كىم؟ ا ق ش گەورگيا شتاتى ۇكىمەتىنىڭ قازىرگى باس حاتشىسى. ونىڭ دەنساۋلىعىندا اقاۋ بار، 24 جاسقا شىققان جىلى ءبىر جولعى شىرعالاڭ سەبەبىنەن ەكى اياعىنان ايىرىلعان، سول سەبەپتى دوڭگەلەكتى ورىندىقپەن عانا قوزعالا الادى.


    ونىڭ قايتپاس قاجىرىنىڭ ارقاسىندا تاعدىردىڭ تالكەگىنە مويىن ۇسىنباي، ءوز كۇشىنە سۇيەنگەنى جايىنداعى اڭگىمەگە ا ق ش–ىنداعىلارعا تەگىس قانىق. دەسە دە ا ق ش–تىڭ وزىندە دە وسى ادامنىڭ تابىسقا جەتۋشىلەردىڭ دوكەيى كانايجيدىڭ ومىرىنە زور ىقپال جاساعان جان ەكەنىن بىلەتىندەر نەكەن–ساياق.


    ءبىر جەكسەنبى كۇنى كانايجي گەورگيا شتاتىنداعى ءمالىم ۋنيۆەرسيتەتكە بارىپ لەكسيا سويلەيدى. ول لەكسياسىن اياقتاپ، قوناقجايعا قايتار جولىندا ليفتتە ءبىر مۇگەدەك ادامعا جولىعىپ قالادى. ول ليفتتىڭ بۇرىشىندا دوڭگەلەكتى ورىندىقتا وتىرعان سىرتتاي قاراعاندا وتە كوڭىلدى وسى ادامنىڭ ەكى اياعى جوق ەكەنىن بايقايدى. ليفت مۇگەدەكتەر تۇسەتىن قاباتقا توقتاعان كەزدە، ول اشىق–جارقىن بەينەدە كانايجيعا جول بوساتىپ، دوڭگەلەكتى ورىندىعىن بۇرىپ الۋدى ايتادى. _ عافۋ ەتەرسىز،–دەيدى ول، _ ءسىزدى اۋرەلەپ قوياتىن بولدىم. كانايجي وسى ءسوزدى ايتقان ادامنىڭ جۇزىنەن وزىنە دەگەن بەرىك سەنىمى مەن جايدارلى كۇلكىسىن كورەدى.


    كانايجي ليفتتەن ءتۇسىپ، قوناق ۇيگە قايتىپ كەلگەننەن كەيىن، الگى ادامنىڭ مىعىم سەنىمى مەن رياسىز كۇلكىسى كوز الدىنان كەتپەي قويادى. كانايجي بۇنداي سەنىمنىڭ استارىندا كەرەمەت اڭگىمەنىڭ جاتقانىنا ءشۇبالانبايدى، سونىمەن وسى ادامدى ىزدەۋگە بەكيدى.


    _ ۋاقيعا كوپ جىلداردىڭ الدىندا بولعان ەدى،–دەيدى بان فۋتسىن كانايجيعا كۇلىمسىرەپ،–جاڭعاق اعاشىنىڭ بۇتاقتارىن قيىپ، بۇرشاق كوكونىسىنىڭ ساباعىن تىرەمەك بولدىم. اعاش بۇتاقتارىن ماشيناعا تيەپ ۇيگە قايتىپ كەلە جاتقانىمدا ءبىر تال اعاش بۇتاعى سىرعىپ ءتۇسىپ، ماشينا موتورىنا قىسىلىپ قالدى، وسى كەزدە ماشينا شورت بۇرىلدى. جولدان شىعىپ كەتكەندىكتەن اعاشقا سوعىلدىم. ول جىلى 24 جاستا ەدىم، ەكى اياعىم كەسىلدى، سودان باستاپ قارعا ادىم جەر باسقان ەمەسپىن.

 


    كانايجي مۇنداي باقىتسىزدىققا قالاي توزگەنىن سۇرايدى. فۋتسىن بىلاي دەيدى:


    _ مەن بۇرىن بۇنداي ەمەس ەدىم. ونىڭ ايتۋىنشا بۇرىندارى ول كەك پەن ىزاعا بۋلىعىپ، تاعدىرىنا نالىپ جۇرەدى ەكەن، ءبىراق ۋاقىت زۋلاپ ءوتىپ جاتادى، اشۋلانا بەرگەندە تەك باسقالارعا جاۋىعا قاراۋدان وزگە تۇسەر پايدا جوق ەكەنىن بايقاپتى. _ مەن اقىرى مىنانى ءتۇسىندىم،–دەيدى ول، _ كوپشىلىكتىڭ ماعان بولعان مامىلەسى جاقسى، سوندىقتان تىم قۇرىعاندا مەن دە باسقالارعا جاقسى مامىلەدە بولۋىم كەرەك.


    كانايجي بان فۋتسىننان:


    _ كوپ جىلداردان كەيىن، سول جولعى شىرعالاڭعا تاپ بولۋىڭدى ەڭ ۇرەيلى باقىتسىزدىق دەپ سەزىنبەدىڭ بە؟–دەپ سۇرايدى. بان فۋتسىن تاباندا:


    _ ولاي سەزىنبەيتىن بولدىم،–دەپ جاۋاپ قايتارادى. ول جالعاستى بىلاي دەيدى، _ قازىر سول جولعى شىرعالاڭعا ۇشىراعانىم دا ءجون بولدى دەپ قارايمىن. ول كانايجيعا سول كەزدەگى ۇرەي مەن وكىنىشتەن ارىلعاننان كەيىن مۇلدە بوتەن دۇنيەدە ءومىر سۇرگەنىن ايتادى. ول باستابىندا كىتاپ وقيدى. جاقسى ادەبي كىتاپتارعا قۇمارتادى. سودان كەيىنگى 14 جىلدا ول شامامەن ءبىر مىڭ 400 دانا كىتاپ وقيدى، سول كىتاپتار وعان شىت جاڭا الەمنىڭ ەسىگىن اشادى، ونىڭ كوز اياسى مەن يدەياسى كۇرت وزگەرەدى. باستابىندا مۋزىكا تىڭدايدى، العاشىندا كوڭىلدى قۇلازىتاتىن سيمفونيالىق مۋزىكالار قازىر ونى تەبىرەنىسكە بولەيتىن بولدى. ەڭ ماڭىزدىسى، ول وي جۇگىرتۋگە داعدىلانادى. ول بىلاي دەيدى: مەن الەمگە شۇقشيا نازار اۋدارامىن، شىنايى قۇن كوزقاراسىمەن قارايمىن. بۇدان بۇرىنعى سوڭىنا تۇسكەن نارسەلەرىمنىڭ كوك تيىندىق قۇنى جوق ەكەنىن ەندى ءتۇسىنىپ كەلەمىن.


    بان فۋتسىننىڭ ءومىر كەشىرمەسىن بىلگەن ءارقانداي ادام، ودان زور شابىت الادى. ەگەر بىرەۋ ءوزىن قومسىنۋدى اياعىنا تاپتاي السا، باسقالاردىڭ مۇسىركەۋىن قابىلداماۋعا، وزگەلەرگە جايدارى مىنەز كورسەتۋگە بەكي السا، وندا ونىڭ كوڭىلىنىڭ تەرەڭ تۇكپىرىنە جاسىرىنعان ەنەرگيا جانار تاۋشا اتىلىپ شىعاتىن بولادى.

 

اۋدارعان قايرات جۇماش ۇلى

未标题-1.jpg
图-1.jpg
图1.jpg
笑脸.jpg
QQ图片20160223110446.jpg