قۇتىبيدەن تارالدى سىبىزعىنىڭ سىرلى ءۇنى
0
2016-02-26 14:48:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :داۋىلبەك


    ءوز ءتىلشىمىز سەرىك راقىم ۇلى مەن ۇشار كادىربەك ۇلى قۇتىبيدەن حابارلايدى. حالقىمىزدىڭ ۇشان- تەڭىز ءان- كۇيمەن قوسا سان الۋان سازدى، ادامنىڭ جانىن جاۋلاپ، سەزىمىن باۋراپ، تەرەڭ ءماندى، ەركە نازدى، شابىتىڭدى سەلدەتىپ، قيالىڭدى قىدىرتىپ، جانىڭا جالىن، ويىڭا دارىن قوسىپ، ءوزىنىڭ مۇڭدى سازدى اۋەنىمەن تىڭداۋشىنىڭ جان سەزىمىمەن توعىسىپ، جۇرەك قىلىن شەرتىپ، كوڭىل پەردەسىن باسا الاتىن قاستەرلى دە قاسيەتتى مۋزيكا ونەرىنىڭ ءبىرى- سىبىزعى كۇيلەرى.


    سىبىزعى قازاق حالقىنىڭ ەجەلگى مۋزيكا اسپاپتارىنىڭ ءبىرى، ۇلتىمىزدىڭ تامىرلى دا ورەلى مادەنيەتىمىزدىڭ بايتەرەگى بولعان سىبىزعى تارتۋ ونەرىمىزدى، ءداۋىر تالابىنا ساي بايىتىپ كەمەلدەندىرۋ، ۇرپاقتان-ۇرپاققا جالعاۋ، ءبىزدىڭ بۇگىنگى تاڭداعى باستى مىندەتىمىز.


    جازبا جانە اڭىزدارعا سۇيەنسەك، سىبىزعىنىڭ حالىق ىشىنە جالعاسۋ تاريحى، قازاق ۇلتىنىڭ قالىپتاسۋى، ءوسۋ تاريحىمەن بىرگە قالىپتاسقان.


    سان عاسىرلىق كوشپەندىلەر مادەنيەتىن جالعاستىرعان حالقىمىز ءوزىنىڭ ارمان ماقساتىن، ساعىنىشىن، باسىپ وتكەن تارعالاڭ تاريحىن، سىبىزعى ۇنىنە ساپ تاماشا كۇي تارتقان.


    مەملەكەتىمىزدىڭ بەيزاتتىق مادەنيەت مۇرالارىن قورعاۋ ەرەجەسى مەن از ۇلتتاردىڭ ءداستۇرلى مادەنيەتىن دامىتۋ ساياساتى، ءبىزدىڭ ۇلتتىق مادەنيەتىمىزدى تۇسىنۋىمىزگە، دامىتۋىمىزعا قايتالاي ۇلكەن وراي جاراتتى.


    ەلىمىز قازاقتارى اراسىندا سىبىزعى اسپابىنا مۇراگەرلىك ەتۋ جاعدايى ادامدى قۋانتادى. مىسالى: قۇتىبي اۋدانى، ءۇرىمجى اۋدانى، شىڭگىل اۋدانى، بۋىرشىن اۋدانى، تەكەس اۋدانى، ءدوربىلجىن اۋدانى سياقتى جەرلەردە اسىرەسە قۇتىبي اۋدانىندا سىبىزعى تارتۋشىلار قاتارى ءۇزىلىس تاپپاي جالعاسىپ كەلەدى. قۇتىبي اۋدانى سىبىزعى اسپابىنىڭ مۇراگەرلەرىن تاربيەلەۋدە الدىڭعى قاتاردان بوي كورسەتىپ، ەل اراسىندا سىبىزعى مەكەنى دەگەن دەپتە اتالىپ جۇر. بۇل قۇتىبي اۋدانىنداعى ۇكىمەت باسشىلارىنىڭ ءمان بەرۋى مەن سىبىزعى ونەرپازدارىنىڭ تالپىنىسىنان دەمەۋ بەرىپ، قولداۋ كورسەتۋىنىڭ جەمىسى دەپ بىلەمىز. ال وسى ەلدى مەكەندەگى كيەلى مادەنيەتىمىزدىڭ مۇراگەرى قاتارىنان ورىن العان حالىق اراسىنداعى سىبىزعىشىلار وزدەرىنىڭ بويىنداعى ونەرىن سوڭعى بۋىنعا قالدىرۋ، وعان مۇراگەرلەردى تاربيەلەۋدى اسا داڭىقتى مىندەت دەپ ءبىلدى. ولاردىڭ ۇلت مادەنيەتىن دامىتۋعا سىڭىرگەن سۇبەلى ەڭبەگىنىڭ ناتيجەسىندە قازاقتىڭ سىبىزعى ونەرىنىڭ ماڭگى ۇزىلمەي، تۇتاس جۇڭحۋا مۋزيكا مادەنيەتى قامباسىندا جاقۇتتاي جارقىراپ تۇرۋىنا تۇرتكى بولدى.


    قۇتىبي اۋدانىندا قازىرگى تاڭدا نەشە بۋىن سىبىزعىشىلاردىڭ سونى سورابى جارقىراپ، كەيىنگى بۋىنعا ءمولدىر بۇلاق بولىپ قۇيىلىپ، جۇرت جۇرەگىن جەلپىندىرىپ، سبىزعىنىڭ سىرلى ءۇنى سان ۇرپاقتىڭ ساناسىنا ۇيالادى. العاشقى بۋىن سىبىزعىشىلار: قاليپا، بورەكە، سىماعۇل، قايساباي، رايقان، قۇرىش، ىبىكەي، ەدەن قاتارلىلار، ورتا بۋىن سىبىزعشىلاردان، ناقان، تولەگەن، سالىمجان، نيعىمەت، قايسا، قابدىعالىم، ءمانسۇر قاتارلىلاردى، قازىرگى تولقىنىنان دانيال، شاكەن، ەركىنتاي، تاسكەن، تاستىباي، بەيسەنقان، ايتجان، قابدىل، تولەۋ قاتارلى 50گە تارتا ونەرپاز سىبىزعى ونەرىنە مۇراگەرلىك ەتىپ، اتا مۇرانى ارداقتاۋ، كەيىنگى بۋىنعا سىڭىردە يگى ەڭبەكتەر ەتىپ كەلەدى.


    2006- جىلى قۇتىبي اۋدانى سبىزعى تارتۋ ونەرىن قالاي دامىتۋ تۋرالى جيىن اشىپ، ارناۋلى قاراجات ءبولىپ، كونسەرت قويىپ، شينجياڭ تەلەۆزياسىمەن بىرلەسىپ، «ماڭگىلىك سارىن» اتتى كوركەم فيلم ءتۇسىرىپ، ەلىمىزدىڭ ءىشى سىرتىنا تانستىردى. بۇل اۋدان 2010- جىلى سىبىزعى تارتۋ ونەرىمىزدى اۆتونوميالى رايون دارەجەلى بەيزاتتىق مادەني مۇرا مۇرالار تىزىمدىگىنە جولداپ، 2013- جىلى رەسىمي بەكىتىلدى. بۇل ونەردىڭ مۇراگەرى سول كەزدە قارت سبىزعىشى نيعىمەت اقساقال بولىپ بەكىتىلگەن، 2014- جىلى ول كىسى قايتىس بولعاننان كەيىن بۇل ونەردىڭ مۇراگەرى تولەۋ بولىپ بەكىتىلدى. 2015- جىلى قاڭتار ايىندا ۇلتىمىزدىڭ وسى ءبىر كيەلى ونەرىن ۇيىمدى تۇردە دامىتۋ ءۇشىن، قۇتىبي اۋدانى سىبىزعى سازى ءداستۇرلى مادەنيەتتى تاراتۋ- دامىتۋ قوعامىن قۇرىپ، مادەنيەتىمىزدى مايەكتەندىرۋگە سارا جول اشتى. سىبىزعى قوعامى قۇرىلعاننان كەيىن سىبىزعى ونەرىن دامىتۋ مەن جالعاستىرۋدىڭ بىردەن –ءبىر جولى جاس جەتكىنشەكتەردى باۋلۋ ەكەنىن تانىپ جەتىپ، 2015- جىلى ناۋرىز ايىندا تورعايتى قالاشىعى ءتۇيىندى باستاۋش مەكتەبىندە سبىزعى ونەرىنە تاربيەلەۋ كلاسىن اشىپ، قابدىل، ابەن قاتارلى ەكى مۇعالىم قازىرگە دەيىن 50 دەن ارتىق بالانى اقىسىز تاربيەلەپ، جاس ۇرپاق ساناسىنا سڭىرۋمەن قابات، كيەلى ساحىنالارعا شىعارىپ، جۇرت اراسىندا تاماشا اڭىس قالىپتاستىردى.


    بۇل كۇندەرى قۇتىبي اۋدانى كيەلى اسىل مۇرامىز سىبىزعى تارتۋ ونەرىمىزدى ۇرپاقتان-ۇرپاققا جالعاستىرىپ، زامانا ۇنىمەن سايكەستىرىپ، ۇلتىمىزدىڭ باسقادا مۋزيكا اسپاپتارىمەن قوسىپ، تۇرلەندىرىپ، دامىتۋعا كۇش سالىپ كەلەدى.

134.jpg
未标题-1.jpg
图-1.jpg
图1.jpg
笑脸.jpg