«اق پەيىل جاندار» كومەككە ءزارۋ جاندارعا مەيىر باعىشتادى
0
2016-02-27 23:17:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :داۋىلبەك

 


    تورابىمىزدىڭ ۇسىنىس ەتىلگەن ءتىلشىسى ساعىنبەك رابات ۇلى التايدان حابارلايدى. ادام جانى ىزگىلىك پەن مەيىر-شاپاعاتقا، قايىرىمدىلىققا تولى بولعان سايىن جۇرەكتەرىنىڭ جىلۋىن، سۇيىسپەنشىلىك سەزىمىن باسقالارعا جەتكىزە الادى ءارى ودان وزىنە ۇشان تەڭىز باقىت پەن قۋانىشتىڭ ءلاززاتىن تابا الادى. حالقىمىزدىڭ ايرانداي ۇيىعان بەرەكەسىن 2016-جىلى اقپاننىڭ 26-كۇنى التاي قالاسىنداعى «اق پەيىل جاندار» مەيىر باعشتاۋ ۇيىمىنىڭ شەمىرشەك قالاشىعىندا وتكىزگەن مەيىر باعىشتاۋ قيمىلى تاعى ءبىر رەت دالەلدەدى.


    بۇل ۇيىم اقپاننىڭ 26-كۇنى تۇستە، شەمىرشەك قالاشىعىنىڭ شەمىرشەك قىستاعىندا قالاشىق ۇكىمەتتىڭ قولداۋى، قالاشىقتاعى اعاجاي مەيىربان انالار قوعامى مۇشەلەرىنىڭ، قالاشىق ەمحاناسىنداعى اق حالاتتى شيپاگەرلەردىڭ، التاي ساياحات كلوبىنداعىلاردىڭ جانە قىستاق تۇرعىندارىنىڭ ءۇن قوسۋىندا، اق قان اۋىرۋىنا شالدىعىپ، 2 جىلدان استام ۋاقىتتان بەرى نەشە رەت حيميالىق جولمەن ەمدەلگەن 8 جاستاعى جۇلدىز بوگەنباي قىزىنا 11 مىڭ 500 يۋان، قيىنشىلىق سەبەبىنەن وقۋدان قول ۇزگەن شاراپات شاكەر قىزى مەن سەرۋەن اقىت قىزىنا جەكە-جەكە 2000 يۋاننان جىلۋ اتادى. «بىتەر ءىستىڭ باسىنا، جاقسى كەلەر قاسىنا» دەگەندەيىن، جۇڭگو كوممۋنيستىك جاستار وداعى التاي ايماقتىق كوميتەتىنىڭ شۋجيى نۇربەك ريزابەك ۇلىنىڭ ارنايى بارىپ، لەبىز ءبىلدىرۋى قيمىلدىڭ ورەسىن ءتىپتى دە جوعارى ورەگە كوتەردى.


    التاي قالاسىنداعى كەنجە سىلامبەك قىزىنىڭ جەتەكشىلىگىندە، 2015-جىلدىڭ قاراشا ايىندا التىنتاۋ باۋرايىنداعى التىن سىرعالى انالار مەن اق يىق ازاماتتاردان قۇرالعان «اق پەيىل جاندار» مەيىر باعىشتاۋ ۇيىمىنىڭ العاشقى مۇشەسى 60 ادام بولسا، بىرتە-بىرتە دامىپ بۇگىنگى كۇنى 150 ادامعا جەتتى. «كوپ تۇكىرسە كول بولار»، «جۇمىلا كوتەرگەن جۇك جەڭىل» دەگەندى وزدەرىنىڭ ۇستانىمى ەتكەن بۇل ۇيىم التاي قالاسى سارقۋسىن اۋىلى كۇرتى قىستاعىنىڭ تۇرعىنى داۋلەتقاننىڭ سالماقتى ناۋقاسقا شالدىققان 5 جاستاعى بالاسى جانارىستى ەمدەتۋى ءۇشىن بىلتىر قاراشانىڭ 9-كۇنى 6000 يۋان جىلۋ جيناپ بەرسە، بيىل قاڭتاردىڭ 10-كۇنى جانارىستىڭ جالعاستى جوعارىلاپ ەمدەلۋى ءۇشىن تاعى دا 8000 يۋان جىلۋ اتادى. بىلتىر جەلتوقساننىڭ 6-كۇنى التاي قالاسى قىزىلتاس قالاشىعىنىڭ سارقامىس قىستاعىنداعى «ەڭ تومەنگى تۇرمىسىن قامسىزداندىرۋ قاراجاتىنان» يگىلىكتەتىن، اكەلى-بالالى ەكەۋى بىردەي نەرۆ سيپاتتى بۇلشق ەت سولۋ ناۋقاسىنا شالدىققان ءشارىپقاننىڭ وتباسىنا 10 مىڭ يۋان اقشا جانە تۇرمىستىق تۇتىنۋ بۇيىمدارىن جەتكىزىپ بەرىپ، «اق پەيىل جانداردىڭ» ىزگى تىلەگىن ءبىلدىردى.


    قۇرمەتتى توراپتاس، كەلەسى بەتتەن باستاپ ءتىلشىنىڭ «اق پەيىل جاندار» مەيىر باعشتاۋ ۇيىمىنىڭ اقپاننىڭ 26-كۇنى تۇستە، التاي قالاسى شەمىرشەك قالاشىعىنىڭ شەمىرشەك قىستاعىندا وتكىزگەن جىلۋ اتاپ، مەيىر باعىشتاۋ قيمىلىنان تۇسىرگەن سۋرەتتەرىن تاماشالاڭىزدار.


التاي گازەتى مەكەمەسى

138.jpg
135.jpg
134.jpg
137.jpg
未标题-1.jpg